Cebu City – Gipabalik na sa kaulohan ang 151 ka sakop sa SAF o Special Action Force sa Philippine National Police human sa usa ug tunga sa buwan nga pagpabilin sa Cebu City aron pagtabang pagpatuman sa health protocols batok sa Covid 19.
Gipagikan kagahapon sa hapon ang naasoyng puwersa paingon sa headquarters sa PNP sa Campo Crame.
Gipahigayon ang send-off ceremony nianang buntag sa Tisa National High School tinambongan nila ni environment sec. Roy Cimatu ug ret. Gen. Mel Feliciano sa local IATF, Mayor Edgardo Labella, ug ni Brig. Gen. Albert Ignatius Ferro sa PRO 7.
Sa iyang mensahe, si Ferro miingon nga ang send-off ceremony maisip usab nga pagsaulog sa malamposong pagpaus-os sa mga kaso sa virus sa siyudad uban sa ayuda sa mga tropa sa SAF.
Sumala pa ni Ferro, tungod sa pagpatrolya sa mga sakop sa SAF sa palibot sa dakbayan nadisiplina ang publiko pagtuman sa health protocols.
Alang niya, ang estriktong pagpatuman sa SAF sa protocol nakapa-conscious sa publiko.
Nalipay usab si Ferro nga sukad sa pag-abot sa SAF niadtong Hunyo 27, walay usa sa 151 ang nataptan sa virus. I via Jhon Tadlip/JTY
(Source: Cebu City PIO/ Edgardo Labella Facebook Page)
