Gibutyag ni Sarangani Provincial Health Officer Doctor Arvin Alejandro, ug kini ang gikumpirma usab sa gitahasan ni Pangulong Rodrigo Duterte nga si Secretary Carlito Galvez Jr., ang chief implementer sa National Task Force COVID-19 sa iyang pagbisita bag-uhay lang sa Region 12 kuyog ang deputy chief implementer nga si Secretary Vince Dizon, nga ang mga returning OFW ang nahashasan na kini pag-abot pa lang sa Maynila tungod kay sa gawas pa lang sa nasud nipailalum na matud pa sila og katorse (14) ka adlaw nga pag-quarantine ug nakuhaan na og negatibo nga swab test. Paghidangat sa Maynila, laing katorse (14) ka diyas napud nga quarantine ug pag-PCR/swab test kanila. Pag-abot sa ilang lugar, laing katorse (14) ka adlaw napud nga kwarantina.
Nanawagan na lamang si Engineer Gerald Faciol, ang assistant provincial administrator, ngadto sa mga taga-Sarangani Province nga i-welcome ang mga kababayang OFW. Wala dapat matud pay diskriminasyon. Dili lalim ang gibuhat sa mga OFW sa pagtabang sa pag-asdang sa ekonomiya sa Pilipinas pinaagi sa ilang ginapadala nga mga dolyar ug ubang currency nga maoy dakong source sa foreign exchange income sa nasud, maong gitawag sila nga mga modernong bayani.
Samtang, gibutyag ni Mr. Rene Punzalan, ang labaw sa PDRRMO Sarangani, nga naka-andam na ang PSWDO Sarangani sa pag-ayuda sa mga returning OFW sa ilang panginabuhian human unya sa pag-quarantine kanila. Adunay gitagana ang gobyerno sa ilang paghibalik dungan sa Balik Probinsya program sa mga locally stranded individuals (LSIs). Mu-kontak lang sa opisina sa ilang MDRRMO sa mga munisipyo o sa PDRRMO aron magiyahan sa mga buhaton.
Sa pikas nga bahin, nakaani og mga pagdayig ang mga medical ug non-medical personnel sa probinsya sa Sarangani nga maoy gasundo sa mga returning OFW ma-airport man o sa pantalan gumikan nakasuot matud pa sila og mga PPE kon personal protective equipment suit. Una ng gitinguha ni Governor Steve Chiongbian Solon kauban ang pito (7) ka mayor nga ang mga frontliner ang matagaan gayud og kumpletong kagamitan hilabi na ang PPE suit panagana nga dili matakdan sa makamatay nga Coronavirus.
