Inyawaten ti gobierno probinsial babaen iti Information Technology Office dagiti IT equipment a kiniddaw ti Mariano Marcos Memorial Hospital and Medical Center ken ni Gob. Mathew Marcos Manotoc. Maibilang ditoy dagiti 20 wireless security cameras ken uppat a desk top computers nga agpateg amin iti 169 ribu a pisos. Ni Mr. Willy Lorenzo, ti IT head ti nangiyawat kadagiti nasao nga equipment ken ni Mr. Dennis Rubio, head ti I hub unit iti ospital.
Inlawlawag ni Lorenzo a dagiti wireless security cameras ket addaan iti special features a two-way communication. Dagitoy ket nayon nga usaren dagiti medical health workers a mangmonitor kadagiti isolation rooms tapno makissayan iti exposure da kadagiti covid patients. Maipalagip a kiniddaw ni Dr. Lourdez Otayza, chief of Hospital ti MMMH&MC ken ni Gob. Mathew Marcos Manotoc dagiti nasao a ramit tapno adda iti nayon nga usaren da.
Mamati ti gobernador a dakkel a tulong dagiti nasao a kagamitan iti pannakamonitor dagiti kailian nga adda da kadagiti isolation rooms. Ti pay laeng MMMH & MC ti naipaayan iti daytoy kadagupan dagiti amin nga ospital iti probinsia gapu ta isuda pay laeng ti nagkiddaw iti biang ni Gob. Marcos Manotoc.
(Cita Macalipis, RPN DZRL Batac Correspondent)
(Source: Provincial Government of Ilocos Norte)