Napili ti maysa a finalist ti Tan-ok ni Ilocano Documentary Film Festival a mairaman iti International Film Festival Manhattan (IFFM) idiay New York iti pagilian nga Estados Unidos.
Segun ken ni Provincial Tourism Officer Mr. Aianree Raquel daytoy ket ti pelikula a napauloan “Iyallatiw” nga inaramid ni Mr. Melver Ritz Gomez, maysa a mangisursuro iti Mariano Marcos State University.
Mainaig iti daytoy, impadanon a dagus ni Gob. Matthew Marcos Manotoc ti panangkablaawna iti nadakamat a mangisursuro.
Segun iti gobernador, dakkel a pakaidayawan ti Ilocos Norte daytoy a nagtengan ti pelikula nga inaramid ni Gomez.
Imbatadna a daytoy ti mangipamatmat nga adda ti napintas a gasat nga agur-uray kadagiti Ilocano iti “film industry”.
Kunana a daytoy ti pammasingked a saan a nagkamali iti panangirubuatna iti pasalip iti panagaramidan ti pelikula iti daytoy a panawen ti pandemia.
Naituding a maisayangkat intono Mayo 28 agingga ti Mayo 30 ti IFFM a pakaipabuyaan ti iyallatiw.
Naammoan a naitampok iti iyallatiw ti daan a tradisyon a panangikarkararag kadagiti natay.
(Ronald Domingo, RPN DZRL Batac Correspondent)
(Source: Provincial Government of Ilocos Norte)