Gibaliwala lamang sa pipila ka mga residente sa dakbayan ang peligro dala sa COVID-19 nga imbis magpuyo sulod sa panimalay, ang anaa naman hinuon gawas sa kadalanan nagtapok-tapok, nagdula, nag-inom ug aduna pa’y nagpasabong ug manok likod sa SRBC Building.
Kini ang tinuod nga hulagway sa komunidad luyo sa hulga sa COVID-19 nga aduna pa gihapon mga katawhan ang wala mubati ug kahadlok alang sa ilang kaugalingon.
Sa pagronda usab kagahapon sa pipila ka Department Stores ug mall dinhi sa syudad, gamay na lang ang mga customers nga namalit kumpara sa wala pa’y hulga sa COVID-19, ug bisan pa man sa kagamay sa mga customers, wala pa gihapon magkulang ang pipila niini sa pagpahinumdom kalabot na sa social distancing.
Sa laing bahin, nag-out of stock na usab ang supply sa Vit. C partikular sa tambal o tablitas sulod sa usa ka establisyemento sa mall isip pagpakusog sa resistensya sa tawo samtang nagpabilin pa gihapon nga wala’y supply sa rubbing alcohol ug face mask. (Jun Salubre, Ronda 6 RPN DXKS)