Gipamahayag sa PDRRMO Sarangani nga ang mga nasinatian karon nga mga pag-ulan ang epekto sa La Niña phenomenon. Segun ni Rene Punzalan, ang provincial disaster risk reduction and management officer, mulungtad matud pa kini hangtud 1st quarter karong tuiga 2021 subay sa report sa PAG-ASA.
Nagsugod ang La Niña gikan pa Oktubre niaging tuig ug muhangtud sa Marso karon nga tuig. Nakasinati matud pa ang nasud og mga weather disturbance, ang Intertropical Convergence Zone/ITCZ, Low Pressure Area ug Hanging Amihan.
Padayong gipa-igmat ang mga katawhan sa mga pagbaha, landslide ug ang mga sakit nga binitbit sa mga ulan-ulan, sama sa dengue ug diarrhea. Pirme managana dili lang sa Coronavirus kundili sa mga balatian nga manggawas panahon sa ting-ulan.
Walay swerte ang batang babae syete (7) anyos ang edad nga naanod sa sapa sa Kablacan, Maasim niaging mga adlaw, didto na kini nakit-an sa dagat nga wala nay kinabuhi. Bantayanan ang mga kasapaan ug kadagatan tungod kalit lang gamaot ang panahon, maong dili gyud magkumpyansa.
Nihatag og direktiba si Governor Steve Chiongbian Solon sa PDRRMO Sarangani, gawas sa tabang sa LGU Maasim, nga ayudahan ang pamilya sa maong bata nga napagan sa pagbaha. (PIO-SARANGANI)