Isip dugang tabang alang sa probinsya sa Zamboanga del Norte sa kampanya batok CoVid-19, gihatagan ug pagtugot ug otoridad sa Sangguniang Panlalawigan si Governor Roberto Uy sa pagpirma sa Memorandum of Agreement tali sa probinsya sa Zamboanga del Norte ug sa Philippine Charity Sweepstakes Office (PCSO) alang sa P2.5 milyones nga calamity assistance ngadto sa Zamboanga del Norte Medical Center.
Kini pinaagi sa pagpasupot sa resolution ni Board Member Ruth Brillantes, ang Chairperson sa Committee on Health sa Sangguniang Panlalawigan.
Sa maong kasabutan, gisaysay nga si Presidente Rodrigo Roa Duterte mideklarar ug State of Public Health Emergency sa tibuok nasud pinaagi sa Proclamation Number 922 ug State of Calamity pinaagi sa Proclamation Number 929 gumikan sa Corona Virus Disease 2019 ug nagmando sa tanang government agencies ug local government units sa paghatag ug ayuda ug kooperasyon ug pagpalihok sa kinahanglang kapanguhaan alang na sa pagpahigayon ug kritikal, hinanali ug tukmang pagresponde ug mga pamaagi aron sa pagpakigbatok sa hulga sa CoVid-19.
Niini, kaniadtong Marso 24, si Presidente Duterte mipirma sa Republic Act 11469 o ang Bayanihan We Heal As One Act nga nagmando sa tanang government-owned and controlled corporations lakip na sa PCSO sa pagtabang ug paghatag ug pundo alang na sa mga lakang nga ipatuman sa gobyerno batok sa maong makamatay nga sakit.
Niini, wala nagmakuli ang PCSO sa pagsanong sa direktiba sa president sa nasud.
Gisugyot sa PCSO nga ang P2.5 milyones gamiton sa pagpalit sa testing kits, reagents, medical/diagnostic equipment, Personal Protective Equipment o PPE ug mga tambal.
Alang usab sa medical assistance, kini naglangkub sa cost of laboratory/diagnostic procdures, and/or confinement of CoVid-19 patients gawas sa room charges ug professional fees.
Dinhi sa Zamboanga del Norte, aron malikayan ang pagkuyanap sa maong sakit, striktong gipatuman sa border checkpoints ang protocol measures sa otoridad ug uban pang precautionary measures maoy hinungdan nga pabilig luwas ang probinsya sa CoVid-19.
Ingon man, si Governor Roberto Uy ang miipagawas ug Executive order Number 20-31 alang na sa pagpalig-on sa Community Quarantine sa probinsya sa Zamboanga del Norte nga molungtad hangtud Abril 30.