Usa ka patay nga lawas sa Lalaki ang napalgan nga naglutaw didto sa Purok 1, Brgy. Lugdungan, ning dakbayan sa Dipolog mga alas 10:00 sa buntag, Mayo 5, 2024.
Matod sa kapulisan sa Dipolog CPS,sila nakadawat ug usa ka tawag gikan sa usa ka concerned citizen sa nasangpit nga lugar kabahin sa maong insedente.
Sa inisyal nga imbestigasyon, nasayran nga ang patay nga lawas sa usa ka lalaki naila nga si ANGELOU LACLAC TAMBAJOYOT.
Ug atol sa pakighinabi, gibutyag sa igsuong babaye sa biktima nga si LELIT LACLAC TAMBAJOYOT nga mga alas 8:00 sa gabii, Mayo 3, 2024, mibiya ang biktima sa ilang pinuy-anan ug nakig-inom sa pinuy-anan ni Jose Levi Laclac.
Human sa ilang panag-inom, ang biktima miadto sa Sitio Balintawak, Brgy. Lugdungan, dakbayan sa Dipolog, uban ni Jayson Jarmin sa pagtan-aw og duwa sa basketball.
Ug sa mga alas 11:00 sa gabii, Mayo 3, 2024, gibutyag ni MAXKER MUCAY ALOJADO nga iyang nakita ang biktima nga hubog kaayo, nga naglakaw sa dalan nga gapasuray-suray , nga milabay daplin sa nahisgutang suba, paingon sa iyang pinuy-anan.
Dugang pa,base sa inisyal nga findings sa imbestigador, walay nakitang samad sa lawas sa biktima ug gituohang aksidenteng kining nahulog sa suba.
Tungod niini, ang mga otoridad nakig-alayon ngadto sa Dipolog City Health Office alang sa pagpahigayon og post-mortem examination aron masuta pa ang hinungdan sa kamatayon niini.
Samtang, ang patayng lawas sa biktima gihaya na karon sa Rivera Funeral Homes nga nahimutang sa Padre Ramon Street, Brgy. Estaka, Dipolog City. (Medalyn U. Borja)
(Source: Dipolog CPS)