General Santos City – Gipangunahan ni Pangulong Ferdinand Marcos Jr., ang pangpanghatag ug ayuda sa mga mananagat, mga mag-uuma ug mga pamilyang taga Gensan nga apektado sa pag-igo sa El Niño Phenomenon.
Mukabat sa 10, 000 ka benepisyaryo ang nakadawat ug tig P10, 000.00 ilawom sa Assistance to Individuals in Crisis Situation (AIC) sa DSWD.
Gawas niini, mukabat usab sa 38 ka mga benepisyaryo ang nakadawat sa ilang sweldo ilawom sa Tulong Pangkanapbuhay sa Ating Disadvantaged/Displaced Workers Program sa Department of labor and employment kon DOLE.
10 usab ka Scholars ang nakadawat ug livelihood toolkits ug allowance gikan sa Technical Education and Skills Development Authority o TESDA. Samtang nang-apod-apod usab ang Office of The Speaker of the house ug lima ka kilong bugas.
Dungan niini, naghatag usab ang pangulo ug P10 milyones pesos nga pondo sa lokal nga panggamhanan sa syudad diin ang cheque personal usab nga gidawat ni Gensan City Mayor Lorelie Pacquiao.
Dungan usab sa pagbisita sa Pangulo sa Gensan, iyang gitunol ang kantidad P50 million pesos ngadto kang South Cotabato Governor Reynaldo Tamayo Jr. isip tabang ngadto sa mga mag-uuma ug mananagat sa probinsya nga apektado sa hulaw. Susamang kantidad usab ang nadawat ni Sarangani Gobernor Ruel Pacquiao para gihapon sa mga mananagat, mag-uuma ug mga pamilya nga naapektuhan sa el niño sa Sarangani.
Sa iyang mensahe atubangan sa mga benepisyaryo, mga opisyal sa gobyerno sa Gensan, Sarangani ug South Cotabato, gipaniguro ni Pangulong Ferdinand Marcos Jr. nga magpadayon ang gobyerno sa pagpanghatag ug tabang pinansyal sa mga mag-uuma ug mga mananagat nga labing naapektuhan sa pag-igo sa hulaw sa tibuok nasud.
Gihingusgan usab sa Pangulo nga gitutukan sa iyang administrasyon ang nagkadaiyang programa sa gobyerno sa tumong nga makahatag ug dinaliang tabang sa tanang apektado sa hulaw hilabi na sa mga mag-uuma ug mga mananagat. (Rem Agdon)