Ikinadismaya at ikinabahala ni Pangulong Rodrigo Duterte ang mabagal na pag-usad sa pagbuo ng code of conduct sa South China Sea.
Ayon kay Presidential Spokesperson Salvador Panelo, inihayag ito ng pangulo sa kanyang pagdalo sa 34th ASEAN Summit Retreat kahapon.
Aniya, ipinaliwanag ni Pangulong Duterte sa pulong ang posibilidad na mas marami pang maritime incident at pagkakamali ang maganap kung patuloy na maaantala ang pagbuo ng code of conduct
Iginiit pa aniya ng pangulo na malaki ang maitutulong ng code of conduct para maiwasan ang anumang tensyon sa mga pinag-aagawang teritoryo sa South China Sea.
Kasabay nito, tiniyak ni Panelo ang patuloy na pagsusulong ng Pilipinas para sa pagbuo at implementasyon ng 2002 Declaration on the Conduct of Parties in the South China Sea.
