Naiget a prayoridad ni Gov. Matthew Marcos Manotoc iti panaggatang iti bakuna kontra COVID-19 ken iti pannakapatibker iti ekonomiya ditoy probinsia ti Ilocos Norte.
Inpetteng na nga agtultuloy iti pannakasustenar ken pannakapatibker iti healthcare system ditoy probinsia kangrunaan na iti baetan ti pandemia.
Innayon pay ti gobernador, a saan nga agsrdeng ti probinsia nga agsapol iti solusyon para iti pannakaingato iti ekonomiya ditoy babaen iti pannakapatanur iti programa para kadagiti naaepektuan a demograpiya a makatulong iti ekonomiya ditoy Ilocos Norte.
Kinuna pay ni Manotoc, dagitoy nga investments ket kas parte kadagiti programa para iti pagsayaatan ti probinsia nangruna iti agrikultura, aglawlaw, edukasyon ken iti sektor ti transportasyon.
Kabayatanna, inaprobaran ti Sangguniang Panlalawigan ti resolution a mangted bileg iti gobernador a sumrek iti multilateral agreement iti AstraZeneca Pharmaceutical Company para iti pannakagatang iti agdagup 120,000 doses nga AZD1222 vaccine para iti probinsia nga Ilocos Norte.
Author: Alyssa Pagdilao, RPN – DZRL Correspondent
Source: PGIN
