Kun mahimo sundon una nato ang anaa sa balaod samtang pangitaan sa pamaagi nga maalibyohan ang kahimtang sa mga negosyante.
Mao kini ang panawagan ni konsehal Girlie Balaba, chairman sa komite sa social services, atol sa sesyon sa konseho niadtong Lunes nga gidumala ni bise mayor Kikang Uy.
Mahinumduman nga gituki sa konseho ang mulo sa mga negosyante kalabot sa mga gipatumang balayronon sa kagamahan sa dakbayan dinha sa paglukat ug pag-renew sa mga business permits ug licenses.
Nakasabot ako sa sa kahimtang sa atong mga negosyante apan dili karon ang panahon nga atong suspendihon ang pagpatuman sa Cagayan de Oro Revenue Code ingon man sa ordinansa nga naghan-ay sa palisiya alang sa Ease of Doing Business, pamahayag ni Balaba.
Siya midugang nga kun i-suspende ang balaod magdala kini og kalibog ug kagubot sa mga negosyante ilabina niadtong mga nakabayad na. Hinuon, matod niya, ipadayon ang pagpatuman sa balaod samtang tun-an ang mga pamaagi nga matabangan ang mga negosyante sa ilang nasinating kalisod dala sa pandemya.
Ang akong hangyo nga samtang gilugwayan ang panahon sa deadline sa pagrenew sa mga business permits and licenses ngadto sa Pebrero 26, 2021 subling tun-an ang balaod aron mapahaum sa kahimtang sa mga negosyante karong panahona, panawagan ni konsehal Girlie Balaba. (SP-CdeO)