Gibutang karon ubos sa imbestigasyon ang mga doktor sa Cebu Provincial Hospital (CPH)-Danao City tungod sa kamatayon sa tres anyos nga batang biktima sa dengue. Ang biktima nga si James Francis Gulfan maoy bugtong anak sa managtiayong Aireen Manipis ug Dexter Gulfan.
Nanawagan ang pamilya sa bata alang sa hustisya tungod sa gidangatan sa bata. Nasayran nga gibalibaran sa medical staff sa CPH-Danao City sa makaduha ka higayon nga ma-admit ang bata sa maong tambalanan kay matud pa, taas pa man ang platelet count sa bata.
Namugos lang gihapon ang mga ginikanan sa bata nga ma-admit ang ilang anak bisan magbarug pa sila sa ospital apan mibalibad ang doktor kay walay bakante sa ospital.
Niadtong Nobyembre 28, 2018 gidawat na sa usa ka doktor sa CPH-Danao City ang bata apan grabe na ang kahimtang sa pasyente. Pagkasunod adlaw Nobyembre 29, 2018 namatay ang bata kinsa magsaulog unta sa iyang ika-upat nga birthday niadtong Disyembre 7, 2018.
Matud ni Arlene Manipis Reigo, iyaan sa bata nga nagtuo siya nga ang pagpasagad sa usa ka doktor sa CPH-Danao City nakatampo sa kamatayon sa bata.
Gimando ni Provincial Health Office Chief Dr. Rene Catan ang usa ka fact-finding investigation sa maong kaso ug gipasalig usab niya nga walay gyoy mahitabo nga cover-up sa maong kaso.
Gimandoan ni Catan ang pangulo sa CPH-Danao City Dr. Prudencio Manubag paghipos sa tanang mga detalye nga naglambigit sa kamatayon sa batang pasyente.