Pormal nga gilusad ang usa ka ‘collaborative partnership’ tali sa syudad sa Cagayan de Oro ug Zamboanga alayon sa road safety program ug adbokasiya nga gitawag og ‘Ang kalsadang ligtas sa bata ay ligtas sa lahat’.
Ang partnership gilusad atol sa usa ka reception program nga gipangulohan ni Majority Floor leader Atty. Edgar Cabanlas, ang representante ni City Mayor Rolando ‘Klarex’ Uy, ug Zamboanga City Mayor John M. Delipe niadtong Lunes sa gabii, Nobyembre 20, 2023 sa Zamboanga City Hall.
Ang kalihukan kabahin sa official visit sa delegasyon sa Cagayan de Oro City aron pagdawat sa tanyag sa Zamboanga City nga mahimong ‘sister city’ ang dakbayan sa Cagayan de Oro. Hinoon, ang sisterhood agreement pormal nga pirmahan atol sa return visit sa mga opisyales sa Zamboanga City dinhi sa dakbayan sa Cagayan de Oro.
Gawas sa pagkutay og maayong relasyon tali sa duha ka syudad, partikular nga tutokan sa maong ‘partnership’ ang road safety program, ilabina ang paghatag og proteksyon sa mga gagmay’ng kabataan nga mogamit sa kadalanan.
Sa iyang mensahe sa ngalan ni Mayor Klarex, gipadangat ni City Councilor Cabanlas ang imbitasyon ngadto sa mga opisyal sa Zamboanga City sa pagbisita sa dakbayan sa Cagayan de Oro aron ilang masinatian ang gibantog nga pagkamahigalaon ug pagkamaabi-abihon sa mga Kagayanon.
Samtang gikalipay ni Mayor Delipe ang maong imbitasyon ni Cabanlas, ug malaumon kini nga ang naselyohan nga ‘partnership’ tali sa Cagayan de Oro ug Zamboanga magbunga sa positibo ug maayong resulta, ilabina sa pagpaambit sa mga best practices ug kasinatian sa duha ka syudad.
Lakip sa mitambong ug misaksi sa maong makasaysayanong kalihukan ang mga miyembro sa 20th City Council nga sila si Kagawad Yan Lam Lim, Suzette Magtajas-Daba, Dr, Malou Gaane, Romeo Calizo, Jay Roa-Pascual, Atty. James Judith ug Bernie Esparcia, apil ang ilang mga department ug office managers.
News and photo courtesy of Cagayan de Oro City Information Office