Cebu City- Gispenso una sa LTFRB o Land Transportation Franchising & Regulatory Board ang pagpatuman sa ‘no face shield, no ride policy’ sa mga sakyanang de pasahero.
Sumala pa sa director sa LTFRB-7, Eduardo Montealto Jr., ila pang gi-hold ang requirement samtang gipaabot pang mogawas ang dugang guidelines.
Matod ni Montealto, adunay giisyo nga memorandum circular nga nag-ingon nga ang compulsory wearing of face shield gisuspenso pa.
Sa nasayran, ang DOTr o Department of Transportation, diin nahisakop ang LTFRB, miluwat og memorandum circular niadtong Lunes nga nagmando sa pagpataod og face shields sa tanang sumasakay sa public transport sugod sa Agosto 15.
Apan ang ulohang buhatan sa LTFRB miisyo pod og memo pinetsahan og Agosto 1 nga nag-ingon nga ang pagsul-ob sa face shields epektibo dayon human sa publisidad.
Midugang si Montealto nga okey pa ang di mag-face shield sa mga pasahero kay gisuspenso pa ang implementation hangtod sa sunod nga abiso.
Sa kabahin sa mga barko, ipatuman sa CPA o Cebu Port Authority ang ‘no-face shield, no-ride’ policy sa Agosto 15. I via Jhon Tadlip/JTY
(Source: DOTr/LTFRB-7)