Gihulat na lamang ang pagpasar sa loan ordinance nga magtugot kang Mayor Rosalina G. Jalosjos sa ngalan sa kagamhanang lokal sa dakbayan sa Dapitan
aron makasulud sa usa ka kasabutan sa pagpangutang sa mokabat 897 milyones pesos sa Land Bank of the Philippines.
Kini maoy gibutyag ni Konsehal Dug Christoper “Popoy” Mah human natuki sa hawanan sa konseho atol sa regular nga sesyon kagahapon, base sa gipahigayon nga committee hearing tali na sa representante sa LBP, Dipolog City ug local finance committee.
Nagkanayon si Konsehal Mah nga gi-aprobahan na sa maong bangko ang propose loan sa syudad aron mapundohan ang mga nagkadaiyang proyekto.
Malipayon niini nga gi-anunsiyo nga gikan sa ubos nga interes sa 4% kada tuig gikan sa 6%, kini gipakunhod sa 2% kada tuig hangtud Disyembre 31, 2022 o kutob kanus-a taman moepekto ang Bayanihan Act lakip na ang mga kondisyon ug termino gikan 15 ka tuig ngadto lamang sa 10 ka tuig.
Tubag sa Land Bank, nga dili makaapektar sa desisyon sa bangko ang kusganon nga pagsupak nila Vice Mayor Jimboy Chan, ug duha ka mga konsehal nga sila Bembem Hamoy ug Gabriel Cad lakip na ang 16 ka mga kapitanes kinsa ilado nga oposisyon sa administrasyong Jalosjos sa gilaraw nga utang sa kagamhanang lokal alang sa pagatukoron nga Dapitan City Agri-Forestry Development and Post-Harvest Facilities.
Sumala pa nga aprobado na ang maong loan ug walay laing gihulat sa bangko mao ang pagpasar na lamang sa ordinansa.
Isip tubag sa panginsayud sa komitiba kun unsa ang pagpanalipod diha sa pagpagawas sa gipahulam nga dili kuno magamit sa eleksyon sukwahi sa mga pagduda sa uban, mipasalig ang Land Bank nga sa tibuok proseso sila adunay bug-os nga pagkontrolar, diha sa aplikasyon, pag-apruba, proseso sa pagtanyag, ug pagpagawas nga wala’y hinungdan ug ibase sa kalamboan sa pagsingil sa pasiunang pagpagula diin kinahanglan dili molapas sa 15%.
Gumikan niini, adunay gihimo nga inspectorate team nga molantaw sa kinatibuk-ang proyekto ug dili ipagula nga bulto subay sa pagsunod sa mga kinahanglanon nga gitakda sa mga termino ug kondisyon.
Sa katapusan, human nagkahisgot kauban na sa City Planning Officer, gidugangan sa Land Bank ang rekisitos sa pagpasar sa maong loan ang pagbaton sa feasibility study alang sa Mega Market and Transportation Hub diin gilakip ug gibag-o kini sa nasangpit nga ordinansa.
(Source: CITY INFORMATION DIVISION-CID-Dapitan Facebook page)