Cebu City- Dili na mahimong mangaon sud sa mga fast food chains sa lalawigan sa Sugbo ang mga customer tungod sa gipatumang social distancing policy aron paglikay sa coronavirus disease kun Covid 19.
Kini ang gipadayag ni Gob. Gwendolyn Garcia atol sa press conference gahapon sa Kapitolyo.
Sumala pa ni Garcia, moisyo siyag laing executive order aron pagmando sa pagdili sa dining o pagpangaon sa mga fast food restaurants lakip sa mga pizza parlors.
Hinuon, giklaro ni Garcia nga mahimong makapalit sa maong mga establisimento pinaagi sa home deliveries ug ang gitawag og drive thru.
Sa mga eateries o karenderya, matod ni Garcia, apil usab sa samang protocol kon mapirmahan na ang EO.
Giluwatan ni Garcia ang maong pahibawo nunot sa nadawat nga report gikan sa usa ka netizen nga adunay gipahigayong party sa usa ka fast food restaurant sa Danao City sa milabayng adlaw.
Segun pa sa informant, ang host sa party giingong mipirma og waiver sa Covid 19 sa establisimento nga nagtugot kanila pagpahigayon sa kalihokan.