Cebu City – Gipadayon ang pagpamakuna sa dakbayan sa Sugbo karong adlawa nga gipahigayon sa tulo ka mga vaccination site sa syudad.
Naglangkob sa tulo ka vaccination sites sa Cebu City Government ang Robinsons Galleria, UC Banilad ug SM Seaside City.
Gihangyo ang mga senior citizens nga kadtong mga naka-schedule lang karong adlawa ang moadto sa vaccination sites tungod kay di mamahimo ang walk-in.
Una niini, nasuspenso og usa ka semana ang vaccination program dihang nahurot ang suplay sa bakuna.
Sa miaging adlaw, nakadawat ang ang siyudad og kapinsa 9,000 ka doses sa bakuna sa Sinovac.
Suma pa sa lead convenor sa inoculation, Vice Mayor Michael Rama, unahon nila pagtagad ang mga senior citizens nga anaa sa listahan.
Hinuon, ang schedule sa ubang barangay sa dakbayan, sa Mayo 4 pa ug sa mosunod nga mga adlaw ipahibawo ra unya.
Sa iyang bahin, si Jeffrey Ibones, officer-in-charge sa CHO o Health Office, target nila nga makabakuna og hangtod sa kapin sa 9,000 katawo ubos sa Priority A1, A2 ug A3 o health care workers, senior citizens, ug persons with comorbidities.
Si Mayor Edgardo Labella gisaaran pod ni vaccine czar Carlito Galvez, Jr. paghatag og bahin sa umaabot 1.7 milyon ka doses sa Sinovac vaccines.
Base sa gisulti ni Galvez, si Labella mipahibawo sa media nga ang 1.7 milyon ka doses sa bakuna sa Sinovac gitakdang moabot sa nasod karong Mayo 7. (Jhon Tadlip/JTY)
(News & photo courtesy of Cebu City Public Information Office)