Cagayan de Oro – GISUGYOT ni Konsehal Bernie Esparcia nga unta adunay mamugna nga creative team ang kapolisan, National Bureau of Investigation (NBI) ug ubang ahensya sa gobyerno diha sa ilang pagpalapad sa kampanya kontra online sex abuse sa kabataan ug online scam.
Kini human gihisgutan sa Komite sa Public Order ni Konsehal Romeo Calizo, sa tigom sa milabayng semana, ang resolusyon nga gipasaka sa Regional Peace and Order Council nga nanawagan sa lokal nga kagamhanan pinaagi sa Local Peace and Order Council (LPOC), Local Council for Protection of Children (LCPC), Local School Board (LSB) nga makigtambayayong sa Philippine National Police (PNP), NBI ug Department of Education (DepEd) dinha sa pagtumbok sa cybercrime ug cybersecurity related activities.
Matod ni Esparcia nga angayang adunay tahasan sa pagmugna sa ilang social media campaign tungod kay bisan unsa pa ka nindot ang mga video ug hulagway kun walay igong followers ang maong social media account sayang ang kampanya.
News and photo courtesy of Cagayan de Oro City Council