Taliwala sa giatubang karon nga pandemya, paglaum ug kahiusahan ang nahimong tema karong tuiga sa simpleng dayan-dayan sa Pasko nga gipahimutang dinhi sa Capitol Plaza ning dakbayan sa Dipolog.
Kini ang nasayran gikan ni Atty. Valerie Hope Jauculan, ang Public Relations Officer IV sa Provincial Tourism Office.
Dugang ni Atty. Jauculan nga bisan paman adunay giatubang nga krisis karon sa tibuok kalibutan, ipakita pa gihapon sa kagamhanang probinsyal pinaagi sa administrasyon ni Governor Roberto Uy nga adunay paglaum alang sa hayag nga kaugmaon ning pagsaulog sa adlaw’ng natawhan sa atong Manunubos.
Makita unya sa Capitol Plaza mao ang ang mga puti ug hayag nga Christmas Balls, cascading Christmas Tree, Belen, parameter lights, parol ug uban pang dayan-dayan.
Gikalatid nga himuon karong Disyembre 4 ang Virtual Switch On Ceremony sa Capitol plaza aron dili maghuot ang mga dumuduong unya ning maong kalihukan.
Niini, si Governor Uy nanghinaut nga dili kita mawad-an sa paglaum taliwala sa giatubang karon nga pandemya ug magkahiusa kitang tanan sa pagsaulog sa diwa sa Pasko.
(Provincial Information Center – mbmontederamos)