Gipasalig ni Gob. Gwendolyn Garcia gahapon nga dili magpatuman ang probinsiya og liquor ban ug ang gidili lang mao ang pag-inom-inom daplin sa dalan.
Gipasupot kini ni Garcia nunot sa anunsyo sa Cebu City Government nga gibalik ang pagpatuman sa inom-inom tungod sa daghang kalapasan sa quarantine restrictions gumikan sa paghubog-hubog sa mga dapit-publiko.
Sa nasayran, miisyo si Mayor Edgardo Labella og EO 117 nga nag-ban sa panagtagay sa mga kan-anan, bar ug ubang establisimento ug public spaces sa siyudad sugod sa alas 12:01 ganinang kaadlawon.
Ang kagamhanang probinsiyal wala mosundog sa lakang sa siyudad.
Midugang si Garcia nga dili siya pabor nga idili sa mga balay-patigayon ang pagbaligya og bino ug beer sa mga kustomer.
Gipasabot sa gobernador nga ang paghimo sa ingon makapatibhang sa naandang kinitaan sa mga tindahan nga posibleng mosangko pa sa pagpanera.
Suma pa ni Garcia, unsa may daotan kon mag-inom-inom sud sa balay?
Nakasabot siya nga gikinahanglan sa uban nga moinom aron pagpawa sa stress taliwa sa pandemya. l via Jhon Tadlip/ JTY
Source: Cebu Provincial Government: Cebu City PIO