Personal nga gitunol ni Governor Victor J. Yu ang mga scholarship fund ngadto sa mga ginikanan sa tulo ka estudyante sa kursong medisina adlawng Huwebes, Nobyembre 7, isip suporta sa ilang pag-eskwela pinaagi sa provincial scholarship program for medical students.
Ang mga nakadawat mao sila si Percianne Mae Rivera ug Rafael Audrey Regidor, parehas nga mga 3rd-year students sa South Western University, ug si Kent Cyrel Villantez, usa ka 2nd-year student sa The Manila Times College. Nakadawat si Rivera og PHP 319,306, si Regidor PHP 322,801, ug si Villantez PHP 393,950.
Gipasabot ni Gov. Yu ang iyang dedikasyon sa pag-amuma sa umaabot nga mga healthcare providers nga makabenepisyo sa probinsya. Kini nga programa kabahin sa iyang administrasyon aron suportahan ang edukasyon ug pagpalambo sa healthcare sa tibuok Zamboanga del Sur.
Hilabihan usab ang kalipay ug pagpasalamat sa mga ginikanan sa tabang pinansyal nga nadawat sa ilang mga anak gikan sa Provincial Government diin nahimo kining katubagan alang sa kalampusan sa ilang pag-eskwela sa kursong medisina.
(Source: Victory Zamboanga del Sur Facebook page)