Zamboanga del Sur – Temporaryong isirado ang mga sementeryo, memorial parks ug columbarium sa Zamboanga del Sur sugod Oktubre 29 hangtod Nobyembre 2 isip pagsunod sa IATF-MEID Resolution sa katuyoan nga maminusan ang risgo sa COVID-19 ‘super spreader’ events panahon sa undas o kalag-kalag.
Sumala sa Executive Order No. 2021-33 nga gipagawas ni Governor Victor Yu adlawng Lunes, parehong pampubliko ug pribadong sam-ang sa lalawigan ang isirado sulod sa lima (5) ka adlaw aron malikayan ang panagtapok sa nasangpit nga mga lugar.
Nakalatid usab sa maong Executive Order nga gidili usab ang pagpahigayon og Halloween parties, “pangangaluwa”, reunion ug uban pang panagtigom sama niini.
Gi-abisohan na lamang ang publiko nga moduaw sa ilang mga mahal sa kinabuhi sa wala pa ang schedule sa pagsirado sa mga sementeryo o human sa maong temporary closure apan pahinumdom alang sa mga LGU, hangtod lamang sa 50% capacity ang gitugotan nga makasulod ug kinahanglang sundon ang striktong health safety protocols.
Gimanduan ang mga local government units sa striktong pagpatuman sa gipagawas nga kamanduan aron masiguro ang health safety sa katawhan batok sa COVID-19.
Sa pagkakaron, padayong mikunhod ang ihap sa COVID-19 cases sa probinsya. Segun sa IPHO, anaa na lamang sa 244 ang total active cases human usa lamang ka kaso ang nadugang kagahapon, Oktubre 25, 2021.
(Source: ZDS Press Bureau, photo courtesy of Victory Zamboanga del Sur)