May nakaangkon og samad sa ulo nga bahin ang usa ka lalaking nagmaneho sa iyang MIO nga motorsiklo human kining nibangga sa likod nga bahin sa FUSO Wing Van Truck nga nagtangag sa plaka numero JAK 7551 sa Barangay Sumadat, Dumalinao, Zamboanga del Sur, alas 8:00 kapin kun kulang karong gabie, Mayo 12, 2024.
Sumala pa sa usa sa mga sakay sa truck, kusog matud pa ang dagan sa motorsiklo samtang gasunod kini kanila ug gituohang lango kini sa ilimnong makahubog. Hinungdan nga aksidente kining nibangga sa likod nga bahin sa truck ug nalagpot sa unahan ang iyang motorsiklo ug nahibilin siya sa likod.
Ning kasamtangan, padayon pa nga giila sa mga otoridad ang identipikasyon sa maong biktima ug ang kinatibuk-ang detalye sa maong panghitabo. (Ernest Villariza)