Kabsan sa kinabuhi ang gikatahong Misis sa Barangay kapitan sa Barangay New Opon, Magsaysay, Davao del Sur human niini nasalo ang giitsang granada kagahapon sa may alas 6:00 sa gabie, Abril 24, 2024 sa sa Purok Pantukan 1, Brgy. J.P Laurel, Panabo City, Davao del Norte.
Giila ang biktima nga si Loreta Saga Abapo 56-anyos ug residente sa Purok 2, Brgy New Opon, Magsaysay.
Sigon sa taho, samtang nagsakay matud pa ang biktima uban ang anak niini nga maoy driver sa nasangpit nga truck nga si Yushehito Abapo, kalit sigon pang nibutho ang duha ka lalaki sakay sa usa ka motorsiklo ug sa walay duha-duha giitsa niini sa mga biktima ang usa ka granada ug gilayon nibusikad.
Tungod sa kakusog sa pagbuto, nakaangkon ug grabeng mga samad sa kalawasan ang misis sa kapitan nga maoy hinungdan sa iyang kamatayon.
Nadala pa sa Carmen District Hospital ang mga biktima apan nakabsan sa kinabuhi ang inahan niini ug swerteng naluwas ang anak nga sa kasamtangan nagpaalim pa sa balay tambalanan.
Nagpadayon pa karun ang gihimong imbestigasyon sa mga kapulisan aron masuta ang responsable ug motibo sa maong krimen.