Gihatagan na og “go signal” sa Commission on Higher Education ang nadugang nga 10 ka campuses sa Zamboanga del Sur Provincial Government College aron mosugod sa operasyon niini sa mga lungsod ning lalawigan sa Zamboanga del Sur.
Atol sa ceremonial turnover of RPPA kun Report on the Result of Preliminary Assessment, gipadayag ni CHEDRO 9 Director Rody Garcia nga ang maong initial permit nagpasabot nga pwede na modawat og mga estudyante ang nasangpit nga campuses sulod sa 2 ka tuig.
Human sa 2 ka tuig, kinahanglan na usab mo-apply ang mga LGU sa Certificate of Program Compliance (COPC) aron makasulod ang mga estudyante sa free tuition ug uban pang bayrunon sa eskwelahan.
Lakip sa mga lungsod nga aduna nay ZDSPGC Campus mao ang Josefina, Midsalip, Tambulig, Tukuran, Mahayag ug Ramon Magsaysay sa 1st District ug Dimataling, Vincenzo Sagun, Lapuyan, ug Tigbao sa 2nd District.
Giawhag usab ni RD Garcia ang suporta sa mga local officials aron nga ma-comply ang uban pang mga requirements alang sa pagdumala sa nasangpit nga mga eskwelahan.
Samtang si Gov. Victor J. Yu gitino ang importansya sa edukasyon alang sa human development rason nga iya gayud nga gipadayon ang ZDSPGC nga gisugdan sa kanhing administrasyon.
Pareho usab gipasalig ni Cong. Divina Grace Yu ug Cong. Victoria Yu ang ilang pagsuporta sa sektor sa edukasyon pinaagi sa pagpangita og pondo sa mga school buildings nga maoy magamit sa kalungsuran.
Sa katapusan mipaabot sa iyang pagpasalamat si Acting School President Dr. Delmer Mondido tungod sa pagtinabangay sa tanang municipal mayors ug school officials lakip sa mga provincial officials aron mahimong posible ang pag-establisar sa ZDSPGC campuses sa lalawigan.
(Source: Victory Zamboanga del Sur)