Nagmalampuson ang pagpahigayon sa pagpang-apod-paod sa Christmas Cash Incentives 2019 alang sa mga barangay officials gikan sa baynte uno (21) ka barangay dinhi sa dakbayan kaganihang buntag, Abril 8 ning tuiga didto sa Orchid Pavilion, Plaza Magsaysay ning dakbayan. Ang maong kalihokan ang gipangunahan sa buhatan sa City Treasurer ilawom sa pagdumala ni Acting City Treasurer, Ms. Hermenia B. Sabando.
Ang maong kalihokan ang gitambongan ni City Mayor Darel Dexter T. Uy, kinsa mipabati sa iyang mensahe sa pagpasalamat ngadto ni Presidente Rodrigo R. Duterte sa insentibo nga nadawat sa Kagamhanang Lokal alang sa mga kabarangayan lakip na ang pahimangno sa mga katawhan sa pagpalig-on kalabot sa atong “immune system” pinaagi sa pagkaon sa mga mahimsog nga pagkaon.
Dugang gisaysay ni Mayor Uy nga kung mahuman ang pag-“liquidate” sa nadawat nga salapi alang sa 2019, ang Christmas Cash Incentives alang sa miaging tuig ang pagasundan usab og panghatag.
Lakip usab sa mitambong sila si DILG Dipolog CLGOO, Ms. Sherrie Charlota Machutes, ABC President ug Sicayab Punong Barangay, Hon Julius B. Gajonera, Sangguniang Panlungsod Majority Floor Leader, Hon. Raul C. Barbaso ug Chairman sa Committee on Ways and Means, Hon. James Cyril L. Ruiz III.
Nasayran nga ang nasangpit nga insentibo ang mikantidad sa ₱ 3,000.00 ka pesos matag usa nga gipanghatag sa mga opisyales lakip na sa mga punong barangay isip pahalipay sa nakab-ot nga mga proyekto pang-“socio civic” sa matag barangay. Gipangunahan ang maong pag-apod-apod ni Acting City Treasurer Sabando inubanan ni LTOO – I, Ms. Kyrene Redillas.
Mipabati usab sa ilang pasalamat sa nadawat nga insentibo sila ni Olingan Punong Barangay, Hon. Ofelia Acis, konsehal sa Brgy. Sicayab, Hon. Ceazar Dwight Tubat ug miyembro sa Sangguniang Kabataan (SK) sa Sta. Filomena, Hon. Mark Dwaine Narciso. (City Information Office-jnp)
