KIDAPAWAN CITY – Mismong si Special Assistant to the President (SAP) Christopher “Bong” Go ang halandong bisita sa pag-abli sa Kalivungan Festival, kagahapon, Agosto 26, didto sa Basket gym, Amas, North Cotabato.
Si Go namulong atol sa opening sa 104th Foundation Anniversary sa probinsiya sa Cotabato diin nag-awhag siya sa katawhan sa probinsya nga magkahiusa aron makab-ot ang dugang kalamposan.
“Ang atong panaghiusa, maoy dalan nga madugangan pa ang pagkab-ot sa atong mga kalampusan,” tipik sa pamulong ni Go.
Nagpasalamat si Go sa suporta sa katawhan sa Cotabato sa tim-os niining suporta sa administrasyon ni Pangulong Rodrigo Duterte.
Hangtud karon, wala pa’y pinal nga desisyon si Go sa hangyo sa katawhan nga siya padaganon sa pagka-Senador sa nasud gumikan alang kaniya, prayoridad niini ang pagserbisyo sa katawhan uban ni Pangulong Rodrigo Duterte.
Gibutyag sab ni Ralph Ryan Rafael ang Executive Assistance ll ni Cotabato Governor Emmylou ”Lala” Mendoza nga abrihan sab ang Market Basket sa Kapitolyo Coop Exhibit, Tourism Expo and Cultural Fair, Museyo Kutawato exhibit ug daghan pa.
Nagpasalamat sab si Gov Mendoza sa daghanang mitambong sa pag-abri sa Kalivungan Festival, kagahapon nga pamatuod lamang nga nagkahiusa ang tanang tribo sa probinsiya.
Nanawagan sab si Gov Mendoza sa mga kasikbit nga probinsiya ug sa katawhan sa Mindanao nga makighiusa sa mabulukon nga selebrasyon sa Kalivungan karong tuiga.