General Santos City – PIPILA ka adlaw gikan karon takda unyang iturn-over ngadto sa lokal nga kagamhanan ning dakbayan sa Gensan ang bag-ong building sa City Health Office (CHO) nga gakantidad og P50 milyones ka pesos nga mapalgan sa compound sa Dr. George P Royeca City Hospital sa Brgy. Lagao, General Santos City.
Napatuman ang hingpit nga katukoran sa bag-ong City Health Office Building ning dakbayan nga gidumala karon ni Dra. Lalaine Calonzo, pinaagi sa paghatag ni Senador Koko Pimentel og budget o pundo niini niadto pang tuig 2023.
Kung hingpit na unyang maturn-over ang maong dakbalay, makalingkawas na sa dakung kantidad sa arkila ang buhatan sa City Health sa usa sa mga building sa NFA-Gensan compound sa susamang Barangay.
Pinaagi niini, mas mahatud pa unya sa mga personahe sa CHO-Gensan ang tinud-anay nga serbisyo sa panlawas alang sa taga Gensan.
Kini usa pa ka lakang padulong sa mas maayo ug epektibo nga pag-atiman sa kahimsog sa mga residente sa General Santos City. (Rem Agdon)