Cagayan de Oro – Makabaton na og kaugalingong biosecured swine facility ang syudad human kini gisubhan didto sa Barangay Tuburan, Miyerkules, Agosto 30, 2023.
Ang groundbreaking gipangulohan ni City Administrator Atty. Roy Hilario Raagas nga maoy mi-representar ni Mayor Rolando `Klarex’ Uy, Department of Agriculture Reg’l Technical Director Carlota Madriaga, City Veterinarian Dr. Perla Asis, Nena Bae Rose Lumandong sa CSWD ug Tuburan Punong Barangay Roy Yañez.
Nasayran nga ang pundo ning maong proyekto nagkantidad og P10 milyones gihatag sa DA-10 ubos sa Integrated National Swine Production Initiative for Recovery and Expansion (INSPIRE Program) alang sa mga lugar nga naigo sa Afrrican Swine Fever (ASF).
Gipasabot usab ni Dir. Madriaga nga lakip sa maong P10 milyones nga budget ang 300 piglets ug mga feeds nga ihatag sa higayon nga mahuman na ang pasilidad.
Alayon niini, gipasalamatan ni Dir. Madriaga si Mayor Klarex nga hugot nga nagsuporta sa programa human kini migahin og dugang pundo nga P5 milyones sa proyekto.
Samtang, gipaabot usab ni Atty. Raagas ang pasalamat ni Mayor Klarex ngadto sa mga kadagkuan sa DA nga kanunay nagtan-aw sa kahimtang sa programang agrikultura sa syudad ug naghatag sa mga dagkong proyekto alang sa mga mag-uuma.
Naglaum ang syudad nga pinaagi niini, hingpit na makabangon ang mga backyard hog raisers sa pagkalugi tungod sa ASF.
Written by Cheleste Simene
Photo courtesy of Jomar Figuracion|CIO