Agsagsagana ti Provincial Public Employment Service Office wenno PESO para iti pannakaisayangkat ti orientation kadagiti benepisiario ti IN Na Negosyo sa Kariton Livelihood Program a pagkammayyetanda iti Department of Labor and Employment.
Segun ken ni Mrs. Anne Marie Lizette B. Atuan, manager ti PESO ti gobierno probinsial, umabot iti tallopulo ket tallo dagiti benepisiario.
Imbatadna a maiyuswat ti nasao nga aktibidad intono Setyembre onse idiay Robinsons Ilocos manipud iti alas nuebe ti bigat agingga ti alas kuatro ti malem.
Inlawlawagna a malaksid iti pannakaipaay ti kariton kadagiti benepisiario ket maisuro pay dagiti maseknan kadagiti rumbeng nga aramidenda para iti pannakaisigurado ti panagballigi ti iyuswatda a negosyo.
Inbunannagna a maipaayan pay dagiti maseknan ti pangrugian a capital. Innayonna a dagiti benepisiario ket dagiti naawanan ti pagtrabahoan gapu iti pandemia a ginubuay ti CoVID-19.
(Source: Provincial Government of Ilocos Norte – Communications & Media Office)