Ang kagamhanang lokal sa Dipolog kauban ang Philippine Commission on Women (PCW) ang mipahigayon sa “Gender and Development (GAD) Executive Briefing” nga gitambongan sa mayoriya sa konseho ning dakbayan, Agosto 23.
Si Mayor Darel Dexter T. Uy, sa iyang mensahe atol sa pag-abli sa nasangpit nga kalihukan ang mipadayag sa iyang suporta dinha sa implementasyon sa mga programa sa GAD tungod kay kini alang man sa kaayohan sa mga lumulupyo sa dakbayan. Sumala pa niini, ang syudad naningkamot nga masiguro ang ka-epektibo sa implementasyon sa mga programa ug polisiya niini, hinungdan nga gipatuman karon ang mga komprehensibong lakang aron kini magmalampuson.
Gisugdan ang nahisgutan nga sesyon sa pagtuki sa “The Dipolog City Women and Men Situationer ; Access to Basic Service and Resources, and participation to economic and political endeavor lakip na ang Gender Mainstreaming (GM) Initiatives/Programs/Ordinances, pinaagi ni Mr. Ernie Rojo, Officer-in-Charge sa Office of the Strategy Management (OSM).
Samtang si Atty. Khristine Kay M. Lazarito-Calingin, Chief GAD Specialist sa PCW-NMFO ug Ms. Alyckssa Maye J. Castanos, GAD Specialist II, PCW-NMFO maoy mga pinasidunggang namulong.
Ang nasangpit nga Executive Session sa GAD maoy usa sa mga aktibidades nga makatabang alang sa pagpalambo sa kapasidad sa mga lokal nga kagamahanan lakip na sa mga hingtungdang ahensiya ug sektor dinha sa implementasyon sa mga programa ug polisiya niini.
(Source: Dipolog City Government Facebook page)