Gibutyag ni Doctor Sharir “Butch” Dulduco, ang provincial director sa Department of Health sa Sarangani ug Gensan, nga walay problema ang nagpadayon karon nga pagbakuna batok Coronavirus sa tibuok Sarangani Province. Wala usab may nakasinati nga na-grabehan sa adverse effect kundili kabahin lang kini sa normal nga epekto.
Segun ni Dr. Dulduco, nakatuman ang probinsya sa Sarangani sa listahan kon priority list nga gimando sa DOH kung unsang sektor ang mauna mabakunahan. Walay isyu matud pa sa papel nila Sarangani Provincial Health Officer Dr. Arvin Alejandro ug mga kaubanan nga unang makabakuna gumikan sobra pa sa health worker ang ilang ginabuhat taga-adlaw sa pag-atubang ug pag-risgo sa ilang kinabuhi kontra COVID-19.
Sa talaan sa PHO Sarangani as of March 26, sa gipagawas nga datus gikan ni Ms. Razel Bustria, ang provincial immunization coordinator, muabot na sa nubentay uno (91) porsyento ang nabakunahan nga mga trabahante sa hospital, pampubliko ug pribadong hospital sa Sarangani Province, gamit ang bakuna nga Sinovac ug AstraZeneca.
162 kabuok hospital workers sa Sarangani Provincial Hospital ang nabakunahan na sa first dose, 148 sa Kiamba Municipal Hospital, 220 sa Glan Municipal Hospital, 90 sa Maasim Municipal Hospital, 66 sa Maitum Municipal Hospital, 45 sa pribadong hospital sa Kiamba ang Tiburcio Aquino Memorial Hospital, ug 115 kabuok ang nabakunahan nga health worker sa Malungon Municipal Hospital.
Rason nga gikalipay kini ni Governor Steve Chiongbian Solon kuyog sila Vice Governor Elmer De Peralta, mga board member, pito ka mayor, bisan na nila Senador Manny ug Congressman Ruel Pacquiao aron hinay-hinay makab-ot ang herd immunity sa Sarangani Province.
(Provincial Information Office – Sarangani)