Davao City – “Akong gikondena ang desisyon sa pagtangtang sa trentay singko ka mga personahe sa pulisiya, lakip ang unom ka mga station commanders, ug city director Col. Richard Bad-ang sa ilang mga katungdanan. Ang maong lakang, may kalambigitan kuno sa imbestigasyon sa buy-bust operation, nagpakita nga dunay pag-abuso sa gahum nga gikan sa mas taas nga mga awtoridad.”
“Ang Davao City Police Office makanunayong nagpakita og pagka-epektibo niini aron mopatigbabaw ang kalinaw ug kahapsay sa dakbayan. Ang atong record nagpakita og mahinungdanong 69% nga pagkunhod sa krimen kung itandi niadtong Mayo 2023 ug karong Mayo 2024. Kini nga kalampusan nagpakita sa dedikasyon ug katakus sa atong pwersa sa kapulisan.”
“Makahiubos nga makasaksi kita sa mga lakang nga makabalda sa trabaho sulod sa ahensiya nga tigpatuman sa balaod. Ang mga opisyal nga gilambigit, lakip na si city director Col. Bad-ang, ug mga station commanders, nagpakita sa ilang di-matarog nga kaakuhan sa ilang mga responsibilidad. Dugang pa, ubay-ubay nga ebidensya ang nakalap ug nagasuporta nga ang maong buy-bust operation gipatigayon subay sa balaod. Ang pagpakatag nga dunay sayop sa ilang gibuhat walay basehan ug dili makatarunganon.“
“Angay natong hinumdoman nga sumala sa Republic Act 6975, “City and Municipal mayors shall exercise operational supervision and control over the PNP units in their respective jurisdictions.” Ang akong aktibong pagsalmot nagpakita sa akong dedikasyon sa pakigtambayayong sa atong kapulisan aron mapreserba ang kalinaw ug kahapsay sa Davao City.”
“Kining ulahing mga lakang nga gihimo batok sa gitangtang nga mga personahe sukwahi kini sa diwa sa kooperasyon ug pagsalig sa usag usa nga mahinungdanon alang sa epektibong pagdumala ug pagpatuman sa balaod.”
“Hugot akong pagsupak sa bisan unsang lakang nga makahuyang sa dugay na nga napanday nga pagsalig tali sa katawhan sa Davao ug sa atong kapulisan. Kining bag-ong panghitabo magsilbing pahinumdom kanato sa kadelikado sa absoluto nga awtoridad. Nanawagan ko nga dunay dayag, klaro ug may tulubagon nga pagpadagan niini nga kaso ug sa hinanaling pagpabalik sa mga opisyales nga di makatarunganong gitangtang sa ilang pwesto.” (Camille Santos Naraga)
(Source: Mayor Sebastian Duterte Facebook page)