Laing pagmaya ug garbo na usab karon sa mga taga-probinsya sa Sarangani gumikan napilian sa Department of Education National Office sa pamunuan ni Secretary Leonor Briones ang jingle nga gibuhat sa estudyante sa JLC kon James L. Chiongbian National Trade School nahimutang sa Barangay Kling, Kiamba, Sarangani Province. Mao kini ang official jingle ug national advocacy campaign sa Brigada Eskwela karon nga school year 2020-2021 alang sa tibuok Pilipinas.
Original composition kini sa estudyante ang ilado na sa youth sector sa Sarangani Province nga si Vinz Abcede Betonio, senior high school taga-Poblacion, Kiamba, sya pud ang nagkanta, ilalum sa superbisyon sa iyang coach ang MAPEH teacher nga si Mr. Rodel Rubia ug sa kinatibuk-ang pwersa sa school management. May cash prize gikan sa opisina ni Secretary Briones nga Traynta Mil ka pesos (P30K), wala pay apil ang insentibo gikan sa buhatan ni DepEd 12 Regional Director Allan Farnazo.
Kini ang gikumpirma mismo ni Sir Gildo Mosqueda, ang SDS/schools division superintendent sa DepEd Sarangani, kung diin ang jingle nga gibuhat sa JLC National Trade School ang maoy madunggan ug ipatugtog sa tanang pampubikong eskwelahan sa entiro nasud samtang magpahigayon og Brigada Eskwela magsugod karon ng adlawa, Lunes, Hunyo 1, dungan sa pormal nga pag-abri sa online ug mobile enrolment kon remote enrolment gamit ang social media ug celfone.
Gitugutan ang mga ginikanan sa pagpahigayon og Brigada Eskwela pero limitado lang ang gidaghanon aron magpabilin ang physical distancing, mahitabo pud kini kung tugutan lamang sa LGU duha (2) ka semana una magsugod ang klase sa Agosto 24.
Apan wala nagpasabot ang Brigada Eskwela karong tuiga nga manglimpyo, mang-disinfect ug magpalambo lang sa mga istraktura sa tulunghaan kundili gamiton ang halos tulo (3) ka bulan nga Brigada Eskwela alang sa inter-aksyon sa mga magtutudlo, ginikanan, PTA ug uban pang education partners aron masuportahan ang padayon nga pagbaton og saktong edukasyon taliwala nga walay face-to-face encounter sa mga estudyante samtang gapaabot sa bakuna batok Coronavirus.
Adunay titulo ang maong national jingle nga “Magbayanihan Na.” Una pa man nagka-COVID ang Pilipinas atong bulan sa Marso, nakapahigayon na ang DepEd og pa-contest ang “2020 Brigada Eskwela Jingle Contest.”
Ang James L. Chiongbian National Trade School ang usa sa mga nag-unang trade school sa entiro Region 12 gumikan sa mga pasidungog nga nadawat sa hisgutanan nga academics, K to 12 implementation, ug sa mga extracurricular events. Gipangalan kini ngadto sa kanhing congressman nga maoy nagpabarog sa maong tulunghaan, kanhing gitawag nga Kling National High School.
Padayon lang ang pag-ayuda sa Provincial Government sa Sarangani sa pagpanguna ni Governor Steve Chiongbian Solon aron mulambo pa ang JLC National Trade School. Niaging tuig, gidawat sa principal nga si German Piamonte ang mga training tools nagkantidad tanan ug Usa ka Milyon ka pesos (P1M) aron munindot pa ang mga kagamitan nga ginagamit sa mga magtutungha sa technical-vocational subjects ug sa ALS/Alternative Learning System. Gipondohan sa Sulong Karunungan program ni Governor Solon kaabag sila Vice Governor Elmer De Peralta, mga board member, LGU Kiamba, Senador Manny ug Congressman Ruel Pacquiao, ug ni Kling Barangay Kapitan Michael Chiongbian.