Tungod sa kawad-on sa testing kits, ang Department of Health (DOH)- Northern Mindanao nagbutyag nga ang mga sample specimens gikan sa person’s under investigation ug monitoring ila pang ipadala ngadto sa Research Institute for Tropical Medicine (RITM) sa Muntilupa City pinaagi sa cargo plane.
Hinuon matud pa ni DOH-Northern Mindanao Development Officer Dr. Ma. Ellen Santua atol sa regular press conference sa coronavirus disease (COVID-19) nga ang nahisgutang kahimtang nasinati man usab sa entiro bahin sa Pilipinas. Gidugang pa niya nga ang detection kits nga gihimo sa UP National Institutes of Health ang ubos pa karon sa pagtuon ug kini gitakda nga mahimuslan sa bulan pa sa Abril.
Nasayran nga ang single kit mokabat sa tag tres mil (P3,000) pesos samtang ang original testing kit mokostar sa singko mil (P5,000) pesos. Hinuon malauman sila nga makadawat sa mga donasyon sa testing kits alang sa rehiyon sa labing madaling panahon.
Sa kabahin ni City Mayor Oscar Moreno, siya nag-ingon nga nagsulat na siya kang Health Secretary Francisco Duque pagpangayo sa testing kits ug nagbutyag sa Northern Mindanao Medical Center o NMMC o ba kaha ang JR Borja General Hospital isip testing center. Apan sa pagkutlo ning maong taho, wala pay tubag si Sec. Duque labot sa nasangpit nga hangyo.
Sa statement niadtong Marso 15, ang Food and Drug Administration (FDA) subli nagsugilon nga walay COVID-19 diagnostic test kits nga available sa publiko tungod kay way kompanya nga naka comply sa minimum set of requirements. Ang mao-mao ra nga diagnostic test kits nga gagamit karon mao lamang ang PRC based lab kits sa Research Institute of Tropical Medicine nga gidonar sa WHO ug sa University of the Philippines National Institute of Health ug sa Department of Science and Technology.