Gi pasakaan na ug reklamo sa buhatan sa National Bureau of Investigation Sarangani District Office o NBI-SARDO ang NMC. Kahibaluan nga misaka na sa pulo ka investment scheme ang gireklamo ngadto sa maong buhatan.
Sa pamahayag ni Atty. Regner Peneza, labaw sa NBI-SarDo nga ulahing gireklamo ang investment company nga NMC diin mitanyag kini og 400% return of investment. Apan pakyas gihapon ang maong kompanya nga ihatag ang interes nga gisaad ngadto sa ilang investors.
Gidugang usab ni Peneza nga sa ubang mga investment scheme nga gireklamo kanila ang wala nila namonitor gumikan tago-tago ang ilang operasyon. Ila nalang nasayran ang maong mga investment scheme dihang duna nay mireklamo sa ilang buhatan.
Dugang pa sa opisyal, mikabat sa P1.9 bilyon ang kantidad sa salapi ang nawagtang gikan sa mga investors. Samtang sa laing mga investment scheme base sa ilang record anaa sa kapin P400 million pesos ang nahanaw sa mga investors nga mireklamo sa ilang buhatan. Andam gihapon sila matud pa sa pag cater sa uban pang mga reklamo nga sama sa investment scheme.