Ang National Food Authority (NFA) dinhi sa Northern Mindanao mipasalig nga ang ilang bodega adunay igong gidaghanon sa bugas nga makabastante pagsupply sa rehiyon hangtud sa mosunod nga tranche sa paghidangat sa imported rice. Matud pa ni NFA Assistant Provincial Manager alang sa Misamis Oriental Samuel Natavio nga subay sa ilang inbentaryo, aduna pa silay 187,000 ka mga bags sa imported rice nga gikan sa Vietnam ug Thailand.
Gisugilon ni Natavio nga ang uban nilang mga stocks na apod apod na sa rehiyon samtang ang nahabilin anaa gihipos sa ilang bodega sa barangays Tablon ug Patag ning dakbayan.
Matud sa NFA, ang daily rice consumption sa Northern Mindanao moabot sa 28,920 bags diin ang Camiguin maoy adunay pinakataas nga demand sa bugas sa mga probinsya sa rehiyon.
Gihimakak sa pikas bahin sa NFA ang speculasyon nga adunay rice hoarding sa Cagayan de Oro.
Si Hazel Belacho, ang NFA-Northern Mindanao Information Officer nag-ingon nga wala silay nadawat nga report labot na sa rice hoarding bisan sa Mindanao Container Terminal (MCT) o ba kaha sa mga pribadong warehouse.