Gumikan sa paspas nga pagkuyanap sa COVID-19 ug nagdaghan nga numero sa nagpositibo sa virus maong naghimo ug dugang quarantine facility ang Provincial Government aron mahatagan sa insaktong pagpahimutang ug maayong pag-atiman ang mga aktibong kaso sa naasoy nga sakit.
Usa sa daling pagresponde nga gihimo sa Provincial Government ilalom sa pagdumala ni Governor Kaka Bag-ao mao ang pagtubag sa mga panginahanglanon sa pasilidad ang dugang pagtukod ug Provincial Care and Containment Center (PCCC) nga mas komportable aron mas paspas ang pag-recover sa mga indibidwal nga aduna’y COVID-19.
Padayon ang aktibong paglihok sa mga tigdumala sa buhatan sa Kapitolyo aron dali nga mahuman ang dugang nga PCCC diin gitawag ug Villas nga aduna’y kapasidad nga maka-accommodate sa 60 ka personahe diin gipaningkamutan nga mahuman sa June 2021.
Niadtong 03 May 2021, usa sa nahuman ang Villa 5 diin malampuson nga gipahimutangan ug gibal-isan sa 10 ka bag-ong confirmed cases sa COVID-19 diin sa matag kwarto adunay electric fan, komportableng higdaan, kaugalingon nga beranda, comfort room (CR) nga aduna’y kompletong gamit sa paglaba, panligo, toiletries, ug uban pa.
Personal kining gisusi ni Gov. Kaka aron makita ang kalidad sa pasilidad ug malantaw ang mga butang alang sa dugang pag i-improve niini.
Nahimo kining posible pinaagi sa hiniusang koordinasyon ug pagtimbayayong sa mga buhatan sa Kapitolyo kauban ang mga hepe ug personahe nga nanguna sa paspas nga paglihok alang sa paghuman sa 8 ka villas sa PCCC.
Usa usab kini sa padayon nga paninguha sa Provincial Government nga ang mga lakang nga gihimo niini alang sa kinatibuk-ang kaayuhan sa probinsya ilabi na sa pakigbatok sa krisis dala sa COVID-19 diin labing apektado niini ang kahimtang sa kaluwasan sa maayong panglawas lakip na ang ekonomikanhong hagit nga hugot niining gipangitaan ug haom nga tubag aron tanang Dinagatnon makapadayon sa ilang kinabuhi ug panginabuhian.
Sa dugang, gipasalamat usab ni Gov. Kaka ang pagkugi sa tanang personalidad ug mga kawani sa buhatan sa Provincial Engineering Office (PEO), Provincial Health Office (PHO), Provincial Social Welfare and Development Office (PSWDO), Provincial Administrator’s Office (PAO), Provincial Planning and Development Office (PPDO), Provincial General Services Office (PGSO), ug uban pang mga buhatan sa Kapitolyo nga aduna’y kalambigitan sa pagpatuman sa daling kahumanan sa naasoy nga pasilidad.
(Source: Kaka Bag-ao Facebook page)