GENERAL SANTOS CITY- KARONG semanaha gilaumang mapasakaan na og kaso sa NBI-Sarangani District Office batok sa nagpaluyo sa Pulis Paluwagan Movement o PPM scam.
Sumala pa sa imbestigador sa NBI SARDO nga si Jeffrey Mosqueda, mokabat sa 159 ka mga complainants ang niduol kanila apan giklaro niini nga dili dungan ang pagpasaka sa maong kaso tungod kay giuna nila ang unang mga complainant.
Dugang niini nga wala nabungat ang pangalan ni kanhi City PNP Director Police Colonel Raul Supiter ug uban pang mga pulis nga gi-relieve sa pwesto tungod sa kalambigitan sa PPM scam gawas na lamang sa mga tawo nga dunay direktang koneksyon kang Shiela Agustin.
Nasayran nga duna usab nagsilbing group leader ang nabiktima og P400 million tungod sa pagpang-engganyo sa 120 percent nga tubo sa ilang investment.