Opisyal ng nadunggan kagahapong adlawa, adlaw nga Lunes, atol sa virtual National Kick-off of School Readiness Program sa DepEd entiro Pilipinas kauban si DepEd Secretary Leonor Briones, ang national jingle sa pag-abri sa klase nga original composition mismo sa mga taga-Kiamba, Sarangani Province.
Si Vinz Abcede Betonio, ang national winner sa pagmugna sa Brigada Eskwela national jingle ug senior high school sa James L. Chiongbian National Trade School sa Kling, Kiamba, kuyog ang iyang coach nga si DepEd Teacher Rodel Rubia, ang nagbuhat sa theme song nga “Bagong Normal, Bagong Mundo
(Balik Eskwela Na),” madunggan na kini sa tibuok Pilipinas.
Ang music video sa duha kauban ang amahan ni Vinz nagtugtog og gitara nga si Mr. Melvin Betonio ang una ng na-post sa FB page sa DepEd Philippines niagi pang mga adlaw aron makita ug makapadasig na sa mga estudyante, ginikanan ug katawhang Pilipino una ang pag-abri sa klase karong Agosto 24 ilalum sa new normal nga pag-eskwela.
Gikalipay og dako nila DepEd Regional Director Allan Farnazo, Sarangani Schools Division Superintendent Gildo Mosqueda ug Governor Steve Chiongbian Solon ang laing dungog na usab para sa probinsya sa Sarangani ug sa Rehiyon Dose.
Samtang, mudawat pa og enrolment ning panahuna ang DepEd Sarangani sa mga wala pa naka-enroll.
Sa pikas nga bahin, laing pito (7) ka mga taga-Sarangani Province ang naka-recover sa COVID-19. Kagabii, sa datus sa DOH 12, anaa na lang sa trese (13) ka mga taga-Sarangani ang naghulat sa negatibo nilang resulta sa ilang mga swab test gumikan singkwentay-tres (53) na kabuok mga Sarangan ang naka-recover sa Coronavirus. Anaa sa otsyenta (80) porsyento ang recovery rate. Dili gihapon magkumpyansa ang direktiba ni Governor Solon, ug padayong tumanon ang mga safety ug quarantine protocol.
(Source: Provincial Information Office-Sarangani Province)