Impannakkel ni Mrs. Elma Gabriel, mangidadaulo ti SME Office ti gobierno probinsial a napintas ti nagresultaan ti naisayangkat a “Tienda ni Gob Trade Fair”
Segun kenkuana, nasursuruk ngem maysa punto lima a milyon a pisos ti napaglakoan dagiti innem a pulo ket uppat nga MSME’s iti lima nga aldaw a pannakaisayangkat ti nasao nga aktibidad.
Imbatadna a kadagupan dagiti nakipartisipar ti Tienda ni Gob ket kaaddoan ti napaglakoan dagiti naglako ti makmakan pakairamanan dagiti prutas ken natnateng, sumarsaruno ti “RTW” wenno arwaten ken maikatlo a kadakkelan ti napaglakoan ti “furniture” wenno alikamen.
Impalgakna a ti naobserbaranda nga iyaadu dagiti napan naggatang ket idi Sabado ken iti maudi nga aldaw ti nasao nga aktibidad.
Inbunannagna a ti napaglakoan iti maudi nga aldaw ket nasursuruk ngem tallo gasut a ribu a pisos
Mainaig iti daytoy, imbatad ni Gabriel a napalaus ti panagyaman dagiti maseknan ken ni Gob. Matthew Marcos Manotoc ken ti sibubukel a gobierno probinsial iti pannakaisayangkat ti nasao a programa.
Kunana nga ibilang dagiti babassit a nagosiante a nakadakdakkel a tulong ti pannakaiyuswat ti nasao nga aktibidad iti pannakailako dagiti produktoda.
Innayonna a kiniddaw pay dagitoy iti gobernador a maulit ti panangiyuswat ti gobierno probinsial iti maiyasping nga aktibidad iti masungsungad nga aldaw. (Irene Ringor, RPN DZRL Batac Correspondent)
(Source: Provincial Government of Ilocos Norte)