Nagkarambola ang duha ka motorsiklo ug usa ka sakyanan didto sa By Pass Road, Turno sakop ning syudad pasado alas 7 ang takna sa buntag kagahapong adlawa, Marso 3, 2020.
Ang mga biktima giila nga sila si Dec Lexter Dingcong, 24 anyos, olitawo, lumulupyo sa Barangay Estaka sakop ning syudad gamaneho sa Yamaha Mio Sporty color pink nga nagtangag sa plakang KP 9934. Si Felizardo Itok, 45 anyos, minyo, lumulupyo sa Barangay Marupay, Roxas nagmaneho sa Fuso Fighter Truck color puti nagtangag sa plakang 6D15319855 ug si Beberle Bodiongan, 26 anyos, dalaga, lumulupyo sa Barangay Bandera, Polanco nagmaneho sa Honda XRM color blue nagtangag sa plakang JO 8358.
Sumala pa sa inisyal nga imbestigasyon sa kapulisan, gibaybay ni Dingcong ang By Pass Road nga nagagikan sa aminahang bahin, paingon kini sa National Highway sa dihang paingon kini sa pikas bahin sa karsada aksidente kining napunggitan ni Itok hinungdan nga nibangga ang gimanehong motorsiklo ni Dingcong ngadto sa gimaneho nga motorsiklo ni Bodiongan  ug nagkarambola sa tunga sa karsada ang tulo ka sakyanan. Nakaangkon ug damage ang atubangang bahin sa ligid ug nabuak nga plate number holder  sa gimanehong motorsiklo ni Bodiongan. Samtang si Dingcong nakaangkon usab ug samad sa walang bahin sa iyang kamot ug gidala kini sa Corazon Aquino Hospital samtang naguba ang atubangang bahin sa iyang gimanehong motorsiklo nga anaa na karon gibalhog sa Dipolog City Police Station alang sa tukmang disposisyon.