CAGAYAN DE ORO CITY- Hangtud sa pagsulat ning maong report, gisuta pa sa otoridad ang hingpit nga hinungdan sa pagkasunog sa municipal hall sa lungsod sa Sugbongcogon, Misamis Oriental sa nakalabay nga adlaw.
Nahurot gyod sa pagkaugdaw ang duha ka andana nga munisipyo nga giilang usa sa pinakakaraan nga struktura sa maong dapit.
Base sa report ni Sugbongcogon Municipal Kagawad Mercy Abcede nga unang migawas ang taho nga nagsumikad ang kalayo sa luyo nga bahin sa DSWD ug paspas nga milamoy ang kalayo sa tibuok gambalay. Apil sa nasunog ang mismong opisina ni Mayor Mildred Lagbas ingon man ang Sangguniang Bayan Hall ug ubang mag importantend opisina sa maong lungsod.
Gisuspetsahan nga ang depektosong linya sa koryente maong hinungdan sa maong sunog ilabi na kay dugay na kaayong gitukod ang maong gambalay. Hinuon walay tawo nga namatay o samaron atol sa maong hitabo.
Gibanabana nga moabot sa upat ka milyon ka pesos ang damyos sa pagkasunog sa karaang struktura sa nahisgutang gambalay.