Cebu City – Malamposong naluwas ang upat ka mananagat nga sakay sa mitikyaob nga motorbanca taliwa sa kadagatan sa dakbayan sa Danao ug isla sa Camotes human sa halos 24 oras nga pagpautaw-utaw sa dagat.
Ang upat ka survivor nailhang sila si Kim Estrera, 21; Yujen Estrera, 39, nga taga Mandaue; Roldan Alcantara 29, nga taga Bulacao, Cebu City; ug Alan Binsig, 49, nga taga Cambat-an, San Francisco, Camotes.
Matod  sa tigpamaba sa Phil. Coast Guard o PCG 7,  Alvin Dagalea, nakadawat og taho ang Coast Guard Station sa  Camotes niadtong Dominggo bahin sa motorbanca nga nakasugat og problema sa kadagatan sa Danao ug Camotes.
Sumala pa ni Dagalea, gikan sa Danao ang motorbanca nga gisakyan sa upat ka mananagat ug naglawig paingon sa San Francisco, Camotes.
Midugang  si Dagalea nga samtang nagpadung sa isla mihapit usab sila pagpangisda apan kalit lang silang gihapak og dagkong bawod hinungdan sa ilang pagkatikyaob.
Nagpada dayon ang coast guard og barko luwan ang quick response team sa Camotes aron pagluwas sa mga biktima.
Nianang alas 9:30 sa gabii sa samang adlaw nakadawat og taho ang Coastguard Station sa Camotes gikan sa paryente sa unang na-missing nga mananagat nga ang bangka nga mitikyaob gigaid na sa payaw.
Pagka karon, anaa na sa maayong kondisyon ang panglawas sa upat ka survivor.
(Jhon Tadlip/ JTY)
(Source: Cebu Coast Guard)