Cagayan De Oro City – Subli nga nanawagan si City Mayor Oscar Moreno sa mga local governments sa Northern Mindanao sa pagtinabagnay sa paningkamot, pagpakgang batok Covid-19 cases tapos nakahatag kabalaka ang padayong pagsaka sa maong kaso sa dakbayan sa Iligan.
Sa iyang Facebook page, gibutyag sa Iligan City Information Office nga ang city government’s emergency operations center health cluster nakarecord sa 119 local Covid-19 cases base niadtong adlawng Sabado o kapin sa 64, Covid-19 cases nga naglakip na sa locally stranded individuals (LSIs) ug returning overseas Filipinos (ROFs). Sa pagkakaron ang syudad sa Cagayan de Oro nagtabang sa dakbayan sa Iligan pinaagi sa pagpapuyo sa ilang mga arrivals sa mga isolation units ning syudad.
Dugtong niini, mipaabot usab ni Moreno sa iyang kabalaka sa kapin 20 ka mga local Covid-19 cases nga narecord sa Misamis Oriental ug siya nanghinaut nga unta dili kini mosaka pag-ayo nga local transmission susama sa nahitabo sa syudad sa Iligan.
Gikonpirmar sa pikas bahin nila ni resident Epidemiologist sa City Hall, Dr. Teodulfo Joselito Retuya sa City Health Officer Dr. Lorraine Nery nga ang mga arrivals apil na ang Covid-19 cases gikan sa Misamis Oriental ang anaa sa isolation units ug sa temporary treatment management facility sa Cagayan de Oro.
Matud pa sa mayor, dili siya angay maghilom niini nga kahimtang. Kinahanglan nga maghiusa, magtinabangay tungod kay ko unsa man ang sitwasyon sa mga silingang dapit dugtong niining kaso sa Covid, apektado gihapon ang matag usa ka dapit, dugang pa ni Moreno. (City Information Office)