SA padayong pagsaka sa COVID19 cases ning syudad, hugot ang panawagan ni Mayor Oscar Moreno ingon man ang mga medical doctors ngadto sa katawhan nga magmatngon pinaagi sa pagsunod kanunay sa minimum public health standards dili lamang sa pampublikong lugar, buhatan, apan lakip na sa tagsa-tagsa ka panimalay.
Basi sa pinakaulahing report ni City Epidemiologist Dr. Teodulfo Joselito Retuya Jr. sa City Health Office (CHO) nga halos anaa na sulod sa panimalay ug mga kauban sa trabaho ang pagpanakod sa COVID19 virus.
Gipasabot ni Mayor Moreno nga ang pagtaas sa kaso posibleng maka-apekto sa Critical Care Utilization Rate (CCUR) o’ ang pagkapuno sa mga hospital nga maoy basihan sa quarantine level sa Cagayan de Oro.
Busa hugot ang panawagan ug hangyo sa kagamhanang lokal sa katawhan nga magtinabangay alang sa pakigbatok sa COVID19 virus. (ACM)