Gilaraw karon sa Misamis Oriental Provincial Hospital-Gingoog City pinanguluhan sa Chief of Hospital niini nga si Dr. Ben Johnson Villanueva nga mahimong Regional Hospital ang balay tambalanan.
Lakip sa naningkamot niini nga mapasar ang draft aron mahimoan og bill o balaodbon ang Kongresista sa Unang Distrito nga si Congressman Christian Unabia ug kini maoy magsilbing tulay sa kalamboan sa dakbayan.
Human nga ma-proseso ang maong rekisitos, gipadayag ni Dr. Villanueva pinaagi ni Cong. Unabia nga walay pagsupak ang Department of Health-10 sa maong laraw sa ospital.
“Nag reply ang DOH kang Cong. Unabia nga walay silay objection kay strategic man kaayo ni ang location sa atong hospital to cater,” matud ni Dr. Villanueva.
Kon ugaling mahimo kini nga Regional Hospital, hilabihan ka dako ang kapuslanan niini tungod kay makahimo na nga makadangop ang mga Level 1 nga mga ospital sa dapit sa Camiguin, Bukidnon, Rehiyon sa CARAGA ug uban pang kasikbit nga dapit sa lalawigan sa balay tambalanan sa dakbayan sa Gingoog.
“Strategic kaayo sya with CARAGA in some part, then Bukidnon mag-operate ta, then dinhi na part pwde napod mo-refer sa eastern part sa Camiguin kay Level 1 man sila pwede sila mo-refer sa ato kung mahimo tang Regional Hospital,” matud ni Dr. Villanueva.
Dugang niini, madugangan sab ang serbisyo nga mahatag sa balay tambalanan kung mahimo kining regional hospital sama sa pagdugang og pasilidad sa dialysis, makahimo na sa pag CT Scan kon Computed Tomography Scan, mag MRI Scan kon Magnetic Resonance Imaging Scans, lakip na ang laboratory work ug 200 bed nga target niini.
Kung usa na kini ka Regional Hospital sa umalabot ang Department of Health na maoy muhawid ug magdumala sa maong ospital ug dili na ang Panggamahang Lokal sa Misamis Oriental nga maoy gigikanan niini.
Aminado si Dr. Villanueva nga ang tabang ug suporta ni Gobernador Bambi sugod sa pagpungko sa lalawigan dako ang kalainan nga nahimo niini sa mga balay tambalanan kon itandi sa miaging administrasyon.
Gani, kaniadto walay saktong pasilidad ug mga ekipo ang balay tambalanan apan karon nahimo na kining episyente ug epektibo sa pagpatuman og mga serbisyo nga dako og tabang alang sa panglawas sa matag Misamisnon.
Kung maaprobahan, mahimo kining usa ka dakong garbo ug makasaysayong panghitabo sa dakbayan sa Gingoog ug lalawigan sa Misamis Oriental.
(Source: Misamis Oriental Provincial Hospital-Gingoog City)