Cebu City – Nakompleto na sa kagamhanang lokal sa Syudad sa Sugbo ang pagpanaud sa bag-ong integrated traffic light system sa 18 ka intersection sa syudad.
Gidungan sa syudad ang ceremonial lighting niini sa blessing ug turnover ngadto sa Cebu City Traffic Office (CCTO) sa upat ka brand new heavy equipment vehicles nga makatabang sa ilang pag serbisyo.
Gihulagway ni Cebu City Mayor Edgar Labella nga ang pagka human sa modernized comprehensive integrated traffic system usa ka mahinungdanon nga kalamboan.
“Aside from the projected improvement of our traffic flow and the reduction of accidents, there is going to be an additional artificial intelligence system that can help us track criminal elements,” matod ni Labella.
Gipasalamatan ni Labella ang tanang naglihok sa pagpatuman sa nahisgutang proyekto taliwa sa pagpakigbatok sa coronavirus.
“I have so much respect for our hard working traffic enforcers nga naningkamot gayod mapatuman ang atong traffic laws bisan pa man init intawon kaayo sa kadalanan,” dugang mensahi sa mayor.
Iyang panghinaot nga kining bag-ong developments karon makatabang ug mapahimuslan sa katawhan.
(Jhon Tadlip/JTY)
(News & photo courtesy of Cebu City Public Information Office)
