Hiniusang gipalabang sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Rolando “Klarex” Uy pagpirma sa Memorandum of Agreement (MoA) tali sa Bukidnon State University Satellite Campuses.
Kini naglangkob sa internship training sa mga tinun-an sa tunghaan sa kursong Bachelor of Science in Public Administration (BSPA) dinha sa City Hall.
Ang panag-tambayayong sa tunghaan ug lokal nga kagamhanan sa Cagayan de Oro gitumong sa paghatag og dugang kahibalo sa mga tinun-an ug pagpalambo sa ilang kasinatian dala ang paglaum nga mahanas sila sa ilang napiling propesyon.
Si Konsehal Suzette Magtajas-Daba, chairman sa komite sa edukasyon ug usa sa nagpaluyo sa gipalabang nga ordinansa, midayeg sa mga tinun-an sa pagpili sa kagamhanan sa dakbayan dinha sa ilang pagbansay bansay kay dako iyang panghinaut nga daghan sila og makat-onan ug posibleng magamit sa ilang umaabot nga pagpanarbaho.
Ang ordinansa nga gipalabang sa konseho alang sa maong katuyuan gipaluyohan usab sa komite sa pamalaod ni Konsehal Ian Mark Nacaya.
(News & photo courtesy of CdeO City Council)